Eibar gailendu egiten da mende berrian sartzean (1900-1936)

Card image cap
Eibar XIX. mendearen hasieran hasi zen aldatzen, eta ordutik gertatutako aldaketak pantaila interaktibo batean ikusiko dira; abiapuntua Ramon Cortazarren 1903ko Zabalguneko Plana da. Eibar berria osatzen da: tailer ugari, fabrika handi eta txikiak, eraikin berriak, hala nola Udaletxea eta Merkatua, edota Ego ibaia estalita.

Aretoa mende honetako lehenengo urteetako gertaerarik adierazgarrienen inguruan dago antolatuta: Armeria Eskola eta bertako ikasleak, Eibarko etorkizuneko enpresariak izango zirenak; Alfa eta kooperatiben sorrera; probatokia (armak probatzeko bankua) eta entsegu-zaldia, Eibar armagintzaren hiriburu gisa behin betiko sendotu zuena.

Garai honetan bata bestearen atzetik izan ziren krisialdiak eta indarraldiak. 1920an armagintzak pairatu zuen krisiak irtenbideak bilatzera behartu zuen hiria. Eta konponbidea produktuak dibertsifikatzearen bidetik etorri zen: bizikleta, josteko makina, kortxoak kentzekoa, grapagailua eta abar dira armagintzako ekoizleen hobetu nahiaren ikur berriak.

Gerra Zibilak zapuztu zuen garai hau. Eibar ia erabat suntsituta eta erraustuta utzi zuten bonbardaketek eta suteek. Gerrari buruzko irudi errealez osatutako proiekzio batek banatzen du gune hau.