Lo que fue bosque un día, rebaño o mineral, gusano o planta, será unido por ALFA

Murtziar margolari, eszenografo eta figuringileak horma-irudi hau Alfa eraikinaren bulegoen harrera-lekuan margotu zuen 1959. urtean, “Marmolejo” izenez ezaguna zen eraikinaren inaugurazio unean hain zuten ere. Lana bertan egon zen 2004. urterarte. Data horretan eraikina eraitsi zuten eta Viudesen lana Armagintza Museoaren harrera-lekuan ezarri zuten. Hasierako eraikinean paretean egindako margolan akrilikoa zen eta gaur egungo kokalekuan erauzi eta ondorengo metalezko euskarrian jarritako lana dugu.

Tamaina handiko lana da ( 516 x 228,50 zm). Bertan Viudesek lehengaiak nola eraldatzen diren aurkezten digu. Horma-irudia sei eszenatan banatzen da lan desberdinen adibideak  azaltzen direlarik: egurrarekin lanak, meatzaritza, kotoi bilketa, abelazkuntza, zetarekin lana edo jantzigintza. Eszenen atzeko aldean industriarekin harremana duten elementuak ikus ditzakegu.

Alfa 1920. urtean jaio zen proiektu kooperatibista bezela (Sociedad Anónima Cooperativa de Producción de Armas de Fuego). Bost urte beranduago, armagintzan gertatutako krisiaren ondorioz, josteko makinak egiten hasi ziren. 1932. urtean armagintza alde batera utzi eta 1940. urtean Máquinas de Coser Alfa S.A. izatera pasa zen. 1953. urtetik aurrera garapen handiko garaia bizi izan zuen Alfak. Momentu horretan Alfa Eraikina egin zuten Eibarren, bertan Vicente Viudesen gaur eskeintzen dizuegun hilabeteko pieza eder hau ezarri zutelarik. 

Margo lan hori,  irailaren 26an, urriaren 3an eta 17an, larunbatetan, enpresaren mendeurrena dela eta antolatu den Alfa 1920-2020 erakusketaren testuinguruan egingo den tailer baten protagonista izango da. Erakusketa irailaren 25etik urriaren 25era bisitatu ahal izango da Portaleko Erakusketa Aretoan.