El Casco: M-15 grapagailua eta M-200 zulatzailea

- Hileko pieza
Maiatzerako pieza-multzo zoragarri hau aukeratu dugu: El Casco luxuzko grapagailua eta zulatzailea. Mikel Izagirrek ekintzaile eibartarrak emandako dohaintza bat da, eta belusez forratutako kartoizko kaxa beltz batean dago gordeta. El Casco grapagailua 1935. urtetik egiten da, eta diseinatzaileen artean klasiko bat dela esan genezake. Luxuzko bertsioan ere eros daiteke, hala nola gure hilabeteko pieza, zeina 23.4 kilatedun urrezko bainuan eginda dagoen.
Card image cap

Mahai-gaineko grapagailuak oinarri luzeska bat du eta muturrean grapatzeko mekanismoari eragiteko pultsadorea. Besoko presioa egiteko sistema oso praktikoa da, eta malgukiaren bitartez grapak banaka irtenarazten ditu. Oinarrian mekanismo-aukeratzailea dauka, grapa motak aukeratzeko. Zulatzailearen kasuan, ezaugarri nagusiak forma eta eraginkortasuna dira. Palanka itxurako pultsadorea oinarriaren kontra sakatuz gero, edozein motatako papera zulatzeko gai da. Gainera, pultsadoreak forma borobila du, eskuarekiko kontaktua errazteko. Oinarria, ordea, errektangularra da, zuzena aurrealdean eta borobilduta atzealdean, palankaren forma jarraituz.

Hastapenean armak egiten zituztenez, El Cascoren piezak eta mekanismoak oso zehatzak dira. Objektu guztiak altzairuzkoak dira, sendoak eta iraunkorrak, eta fabrikazio mekanikoan honako prozesu hauek jarraitzen dituzte: otxabuketa, fresaketa, artezketa eta torneatua. Ondoren, leunketa egiten da, hau da, eskuz, gutxienez, hiru aldiz leuntzen dira objektuak. Azkenik, kobre-, nikel- eta kromo-bainua ematen zaie. Aintzat hartu behar da piezak doitzeko ez dela soldadurarik erabiltzen; horregatik, bulegorako tresna horiek guztiz desmuntatu daitezke. Bizitza osoa irauteko eginda daude.

Enpresa Orbeako bi langilek sortu zuten, Juan Solozabal Mendivek eta Juan Olave Bilbaok, 1920eko irailaren 7an. Armagintzan zuten ezaguera aprobetxatzeko kalitate handiko errebolberrak egiten hasi ziren; 1935. urterako idazmahaietarako objektuak ere egiten zituzten: M-5 grapagailua eta M-500 kontagailu automatikoa, hain zuzen ere. Izandako arrakastaren ondorioz, laster erabaki zuten ekoizpena dibertsifikatzea; horrela, arkatz-zorrozkailuak, zulatzaileak, etab. egiten hasi ziren, betiere, haien xede nagusia izanik objektuen fidagarritasun mekanikoa. Haien ustetan, "una grapa debería de desfilar por la grapadora con la misma precisión que una bala por el cañón de un revólver".

Gerra Zibileko bonbardaketen ondorioz enpresa txikituta geratu zen, eta 1940an eraikin berrira joan ziren, Blas Etxeberria kaleko 3. zenbakira. Handik gutxira eta 70ko hamarkadara arte, merkatuko liderrak izan ziren. Gaur egun ere, 40 herrialde baino gehiagotan saltzen dituzte El Cascoren objektuak, eta, batez ere, maila handiko eta luxuzko paper-dendetan aurki daitezke.

2010etik enpresa Elgetan dago, eta fabrikazio-prozesuak hobetu diren arren, fidagarritasun mekanikoa eta estetika hobesten jarraitzen dute.