GAC patinetea

80. hamarkada pieza_type_2
Patinetea, skateboard, skate, monopatina... iraileko hilabeteko pieza hainbat izenez ezagutzen den ibilgailu edo jostailua da, gaur egun oso modan jarri dena gazte eta ez hain gazteen artean. Ba al zenekien atzeko aldeari tail (buztana) eta aurreko aldeari nose (sudurra) deitzen zaiela?
Card image cap

Jostailu edo ibilgailu hau Mickey Muñoz eta Phil Edwards surflariek asmatu zuten 1963an, Malibun, Kalifornian. Haien asmoa zen lurrean ere surf egitea, eta horretarako patin batzuei gurpilak kendu eta egurrezko taula bati ipini zizkioten. Asmakizun berriari Surf Roll deitu zioten. 60ko hamarkadan monopatinek kautxuzko gurpilak zituzten eta ez ziren lurrera ondo atxikitzen; ondorioz, sarritan gertatzen ziren talkak eta istripuak. 70eko hamarkadan, fabrikatzaileak uretanozko gurpilak erabiltzen hasi ziren, patinetan erabiltzen zirenak bezalakoak.

Skateboard baten zatiak honako hauek dira:

• Ohola: hainbat forma eta tamaina izan ditzake, famatuenak haritz egurrezkoak dira. Oholaren gainean lixa bat dago, taula gainean ondo eusten laguntzeko.

• Ardatzak: gurpilei eusten dietenak.

• Oinarria: normalean ardatzen material eta kolore berekoak, gurpilak taulari lotzeko.

• Gurpilak: gustuen eta eman nahi zaion erabileraren arabera, hainbat material eta tamainakoak izan daitezke.

• Gainera, jasogailuak, torlojuak eta errodamenduak edukitzen dituzte.

Jose Luis Valenciagak museoari dohaintzan emandako patinetea GACek 80ko hamarkadan egindako MobyBoard modeloa da. Egurrezkoa eta laranja kolorekoa da, eta koloretako gurpil bigunak eta ardatz estuak ditu. Pieza bitxia dela iruditzen zaigu, hain zuzen ere, 90eko hamarkadara arte GAC bizikletak eta motozikletak egiteagatik izan baitzen ezaguna. Modelo honetaz gain, beira-zuntzezko beste hiru monopatin egin zituen GACek, guztiak "toro" izeneko ardatz zabalekin: bata gorria gurpil urdinekin; bestea laranja, baita ere gurpil urdinekin; eta hirugarrena urdin distiratsua, koloretako gurpilekin.

Nostalgikoa bazara, eta oroimina baduzu, ez galdu pieza zoragarri hau museoko harreran ikusteko aukera. Edo zergatik ez, partekatu zure umetako edo gaztetako bizipenak gure sare-sozialetan.