Eibarko Udalak hiriaren mapa turistikoa diseinatu du

Eibarko Udalak beste urrats bat eman du hiria turismo-helmuga gisa balioan jartzeko, eta Eibarko mapa turistiko bat diseinatu du, Debegesarekin elkarlanean. Mapak hirian turismoa egiteko informazioa eskaintzea du helburu.

Bisitariei Eibarko egonaldian zer ikus dezaketen jakinarazteko diseinatuta dago mapa, eta, aldi berean, oinezkoentzako guneei, aparkalekuei, eskailera mekanikoei, igogailuei eta bestelako elementuei buruzko informazioa ematen du, orientazioa errazteko.

Mapak hiriko interes turistiko handieneko baliabideak nabarmentzen ditu: udaletxeko eraikina, Ipurua Udal Estadioa, Astelena pilotalekua, San Andres eliza, Portalea kultur etxea, Coliseo Antzokia, Azitaingo baseliza, Gerra Zibilaren Frontearen Interpretazio Zentroa eta Armagintzaren Museoa bera. Bakoitzaren informazio interesgarria duen paragrafo deskribatzaile labur bat du.

Mapa turistikoan, halaber, Unibertsitatearen eremua eta Arratera sartzeko ibilbideak irudikatzen dira, bai eta eremu horretan egin daitezkeen ibilbideei buruzko informazioa ere, eta honako hauei buruzko informazioa ematen da: garraio-webguneak, Eibarko Udalaren webgunea, Debabarrena Turismoarena, Armagintzaren Museoarena eta Gerra Zibilaren Frontearen Interpretazio Zentroarena.

Mapa gaurtik aurrera dago eskuragarri, Armagintzaren Museoan. Museoak Eibarko eta eskualdeko ondare industriala kontserbatu eta zabaltzea du helburu. Gainera, datorren astetik aurrera hiriko ostatuetan ere eskuratu ahal izango da.

Armagintzaren Museoa, Eibarko industriaren historiatik bidaia

Museoa 2007an inauguratu zen Portalea eraikinean, Agirre y Aranzabal fabrika (AYA) egondako eraikin berean, eta hiriaren ibilbide industrialaren ikuspegi historikoa eskaintzen du. Hainbat garaitako piezen bilduma zabal baten bidez, museoak Eibar eta Debabarreneko industriaren eraldaketa aztertzen du, XIV. mende hasierako burdinoletatik gaur egun arte.

Museoaren aretoetan, armen fabrikaziotik XX. mendearen erdialdean Eibarren egiten ziren produktuen aukera zabalerako trantsizioa kontatzen da: bizikletak, josteko makinak, grapagailuak, etxetresna elektriko txikiak, automobilgintzako piezak eta askoz gehiago.

Museoa uztailean asteartetik ostiralera 16:00etatik 20:00etara dago irekita, eta abuztuan asteartetik ostiralera 10:00etatik 13:30etara. Sarrera orokorra 3€ da, murriztua 1,50 € (pentsiodunak, langabezian dauden pertsonak eta 26 urtetik beherako ikasleak), eta doakoa da 7 urtetik beherakoentzat. Osasun-egoera dela eta, bisita gidatuak bertan behera utzi dituzte beste abisu bat eman arte, baina audiogidak daude eskuragarri 2 euroren truke.

Horrez gain, museoak proiekzio-gela bat, dokumentazio-gune bat, Eibarko armagintzaren bibliografia, oparitarako gaiak eta argitalpenak dituen denda txiki bat, jantzitegi-zerbitzua eta atsedenleku bat ditu. Museoa uztailaren 31n, abuztuaren 15ean eta 16an, irailaren 8an itxita egongo da.