Mateo Kareagak grabatutako La Paloma eskopeta, PR modelokoa.
Guztiok dakigunez, 1937an Parisen egin zen Arte eta Tekniken Nazioarteko Erakusketaren Espainiako pabiloian Picassok egindako koadro handi bat nabarmendu zen beste guztien gainetik: gerraren aurkako ikur unibertsala bilakatu den Gernika, Picassok 1937ko apirilaren 26an herri hartan izandako bonbardaketak hunkituta pintatu zuena.
Erakusketa hartan grabatzaile eta armagin eibartarrak ere izan ziren beren produktuak eta lanak aurkezten, Eibarko lan egiteko modua mundura zabaltzeko asmoz. Egingo dugun erakusketa artista haiei egindako omenaldi bat da. Horregatik aukeratu dugu pieza hau, 1937an Parisen ikusgai egon zena: Mateo Kareagak grabatutako La Paloma eskopeta, PR modelokoa.
Ehiza-eskopeta hau 1928an egin zuen "Viuda e hijos de Juan José Sarasqueta" etxeak. Juan José Sarasqueta Victor Sarasqueta anaiarekin hasi zen armagin-lanetan 1887an, baina gero bakoitzak bere bidea hartu zuen, eta 1904an Juan Josek La Paloma marka erregistratu zuen egiten zituen eskopetak bereizteko. Haren heriotzaren ostean markak "Viuda e hijos de Juan José Sarasqueta" izena hartu zuen, eta 1920-1975 bitartean egon zen irekita.
Alderdi teknikoagoei begira, atzekargako arma baten aurrean gaude, tiro bakunekoa eta perkusio zentralekoa, 12 mm-ko kalibrearekin. Kargatze-prozesua eskuz egin behar da, eta kanoien irekiera baskulatzailea da. Bai kolpekariak bai tiragailuak blokeatzeko asegurua baskulan integratuta daude. Berezitasun moduan, armak bi tiragailu ditu: lehenengoa eskuineko kanoiari dagokio, eta bigarrena ezkerrekoari.
Dekorazioak ere garrantzi berezia dauka pieza honetan, izan ere, Mateo Careaga eibartar grabatzaileak egindako behe-erliebe ederrak ditu. Hiru ehiza-eszena tradizional eta hainbat lore-motibo dira nagusi, erliebean zizelkatutako marrazkien bidez irudikatuak. Egileari dagokionez, Eibarko grabatzaile familia batetik zetorren, eta garrantzi historiko handiko piezak egitera iritsi zen, esaterako Asturias eta Leongo Kontseiluaren monetak Gerra Zibilaren garaian. Ezaguna da baita ere Eibarren Bigarren Errepublika aldarrikatu zenean errepublikako bandera lehen aldiz altxatzeko ohorea egokitu zitzaiolako. Momentu hartan udalbatzako zinegotzi gazteena zelako izan zen aukeratua (Acción Republicana alderdikoa).
1937ko erakusketan aurkezteaz gain, eskopeta hau Alfontso XIII.a erregeari ere aurkeztu zitzaion 1928an Astra, Unceta y Cía fabrikara egin zuen bisita batean. Argi dago, beraz, arma honek ibilbide historiko benetan nabarmena izan duela, eta Eibarko armaginek egiten zuten lanaren kalitatea eta balioa agerian uzten dituela.
Horregatik, harrigarria da Parisko erakusketaren ostean eskopeta galduta egon zela jakitea, 50eko hamarkadan baskula Eibarko tailer batean agertu zen arte. Lanaren kalitateak harrituta, Pablo Sarasua damaskinatzailearekin kontaktuan jarri ziren, zeina kasualitatez Mateoren osaba zen. Kanoia eta kulata falta zitzaizkionez berreraiki egin behar izan zuten, baina eskopeta berriz iritsi zen Careagatarren eskuetara. Hasierako dekorazioa egin zuenetik 30 urte igaro baziren ere, Mateok kanoiko apaingarriak gehitu zituen.