Lambretta ziklomotorrerako Zenith karburagailua
Eibarren ekoiztutako Lambretta ziklomotorrerako Zenith 20 MX karburagailua aukeratu dugu hilabeteko pieza gisa; izan ere, pieza gakoa da, XX. mendeko Eibarko bi enpresa handiren ikurra baita: Carbureibar SA eta Lambretta Locomociones SA. 1958. urtean sortutako Zenith karburagailua Lambretta -60ko hamarkadako Eibarko ikonoa- markako lehen ziklomotor modeloetarako egin zen.
Karburagailua, XIX. mendearen erdialdean asmatua, eztanda-motorra osatzen duen piezetako bat da, eta haren funtzioa da motorreko errekuntza-ganberan sartu baino lehen airea eta erregaia neurri egokian nahastea. 80ko hamarkadan, goi zilindradadun ibilgailuak eta gasolina-injektoreak agertzean, sistema honek garrantzia galdu zuen pixkanaka. Gaur egun, karburagailuak edo eztanda-motorrak, injekzio-sistema berrien aldean, zaharkituta daude eta ia-ia ez dira erabiltzen. Injekzio-sistema berriek abantaila inportanteak eskaintzen dituzte potentziari, kontsumoari, segurtasunari eta gas kutsatzaileei dagokienez. Hala ere, hainbat adituren ustez -nostalgiko samarrak, agian- eztanda-motorrak berreskuratu egingo dira, aurrerakuntza eta ikerketa berriak direla-eta, eta mikrozirkuituen erabileraren ondorioz.
Nolanahi ere, une honetan, ez Carbureibarrek ezta Lambrettak ere, biak ala biak gure industria-iraganeko enpresa garrantzitsuak, ezin izango dute ikerketa industrialeko prozesu berri hauetan parte hartu.
1957an eta 1952an sortuak, hurrenez hurren, enpresa biek automobilgintzan garatu zuten beren industria-jarduera, lehenengo urteetan atzerriko ekoizpen-lizentziapean, eta aurrerago beren produktuak ekoiztuta. Izan ere, Carbureibar SA, esaterako, Frantziako Zenith lizentziapean hasi zen karburagailuak egiten, nahiz eta denborarekin bere karburagailuak ekoiztuko zituen motozikloetarako, automobiletarako eta motokultorretarako; baita freno-ekipamenduetarako huts-ponpak eta erregai-ponpa mekanikoak ere. 1971n enpresa Abadiñora eraman zuten, eta 1991n Pierburg taldean integratu zen. Gaur egun, Kolbenschmidt Pierburg AG taldeko partaide da, eta hainbat osagai fabrikatzen ditu automobilgintzarako, hala emisio kutsatzaileak murriztera bideratutakoak, nola aire-elikatze eta freno-sistemei begirakoak. Eibarko enpresen moldakortasunaren beste adibide bat da.
Motorgintza interesatzen bazaizue eta gure historia industriala ezagutzeko jakin-mina baduzue, etorri gure museoko erakusketa interesgarri honetara.