ORBEA Y CIA SENC markako haur-kotxea

Orbea familia, Eibarko beste familia batzuk bezela, XVI. mendetik egon da lotuta armagintzarekin (Juan de Orbea). 1859. urtean ireki zuten arma motzak egiteko Orbea Hermanos lantegia. 1890. urtean lehena izan zen produkzio prozesuetan energia elektrikoa erabiltzen. 1895. urtean hasierako sortzaileak hilda jada, izena aldatu eta  Hermanos Orbea y Compañía izatera pasatu zen.

XX. mendeko 20ko hamarkadaren hasieran familiaren parte bat banandu eta Gasteizen 1924. urtean Hijos de Orbea, S.C. sortu zuten. Bitartean Eibarren armagintzarekin jarraitu zuten Orbea Hermanos izenarekin. Lehenengo Mundu Gerraren ostean, Eibarko beste hainbat enpresak egin zuten modura, makina-erremintak, bizikletak eta haur-kotxeak ere egiten hasi ziren. Prozesu horri aurre egiteko beharrezkoa izan zen instalazioak haunditzea.

XVIII. mendearen erdialdean agertu zirenetik haur-kotxeek bilakaera argia izan dute gaur egunera arte. Hasiera batean trakzioa animalien edo gizakien esku zegoen. XIX. menderarte itxaron beharko dugu bultzatzeko pentsatuak zeuden kotxeak agertu arte. Aldaketa benetan nabarmena XIX. mende amaieran gertatu zen. Haur-kotxearen lehenengo patentea sortu eta kontzeptu modernoari atea ireki zitzaion. Kapazua bi norabideetan jartzeko aukera zegoen eta gurpilak bata bestearekiko independentzia osoz zebiltzan. XX.mendeko 30eko hamarkadan kate-produkzioari hasiera eman zitzaion, eta haur-kotxeetan material berriak agertu ziren, hala nola plastikoa edo goma. Garai hartakoa da hain zuzen ere gaur aurkezten dizuegun pieza.

* S en C  Sociedad en Comandita