Silver Car Suspentsio-Sistema

2009 Hileko pieza
Hil honetan, "Zientziaren, Teknologiaren eta Berrikuntzaren XII. Astea" ospatzen da Euskadin. Europako ekimen garrantzitsu honek zientziarako, teknologiarako eta berrikuntzarako inguru sozial mesedegarriago bat sortzea du helburu. Horregatik, ospakizun honekin bat egiteko, hilabeteko pieza gisa, lasterketa-autoetarako Silver Car markako suspentsio-sistema hau aurkezten dugu, Engimek Ingeniaritzak Eibarren egindakoa. Dudarik gabe, "made in Eibar" berrikuntza teknologikoaren adibide argia dugu.
Card image cap
Oro har, lasterketa-autoetako suspentsio-sistemak, serieko ibilgailuetakoak ez bezala, oso sofistikatuak dira. Izan ere, sistema hauek diseinatuta daude, batetik, lehiaketetan izaten diren jauziak eta inpaktuak xurgatzeko, eta, bestetik, autoa azkar egonkortzeko, jauzi baten ondoren lurra hartzen duenean. Hots, sistema hauek egokitu eta erregulatu egin behar dira, gidatzeko era, pilotua eta lurzorua kontuan hartuta; horregatik ibilgailuaren oinarrizko osagaitzat hartzen dira.

CM ibilgailuentzako Silver Car sistema hau aluminioz eta karbono-altzairuz eginda dago; malguki helikoidal bat dauka, eta baita tutubakar erako motelgailua ere, presio altuko gasduna. Horrek guztiak ibilgailua altueretan erregulatzea ahalbidetu eta lasterketa-autoetarako berezko sistema bihurtzen du. Suspentsio-sistema hau Engimek enpresa eibartarrak sortu zuen neurrira 2009an, ibilgailu jakin baterako: Silver Car markako 1 modeloa.

Silver Car FIAk homologatutako lasterketa-autoetan espezializatutako Nafarroako enpresa bat da. Modelo hauek bereziki diseinatuta daude CM kategorian, mendi-txapelketetan  eta nazio mailako zirkuituetan lehiatzeko. Izan ere, 2009an eta 2010ean, hurrenez hurren, Silver Car S1 modeloarekin, Engimek-ek egindako supentsio-sistemaduna, Pedro Roca pilotuak Espainiako Mendi-Txapelketa irabaztea lortu zuen. Hurrengo urteetan beste pilotu batzuek ere garaipena lortu zuten baldintza berberekin .

Automobilgintza eta teknologia interesatzen bazaizkizue, hil honetan museoa bisitatzera animatzen zaituztegu: aipatutako piezaz gain, gure hiriaren ibilbide historiko-industrial eta teknologikoaz gozatuko duzue.