Banku-tornua

Burdinazko edozein produktu ekoizteko ezinbestekoa izanik, gure industriarekin harreman historiko eta estua du banku-tornuak; izan ere, armagintza lanbidearen jatorritik bertatik funtsezko erreminta izan da gure lantegietan, eta ondoren mota guztietako tailerretara hedatu da. Erreminta hau burdinazko egitura bat da, oin bat eta artikulatutako beso bat dituena. Armagintzan kulatak edo baskulak finkatu eta haien gainean lan egin ahal izateko erabiltzen da. Tornuak piezak ondo eustea ahalbidetzen du eta hainbat operazio mekaniko egitea, hala nola zerratzea, zulatzea, fresatzea, limatzea, markatzea eta abar. Pieza hau, zehazki, Eibarko tailer txiki batekoa da, Sostoa kalean zegoena.

Dudarik gabe, banku-tornua gure ondare industrialaren adibide garrantzitsua da, tradizioz industriari eta burdinaren manufkaturari oso lotuta dagoena, eta gure identitatea eta memoria historikoa ulertzen laguntzen diguna.

Gaur egun, ondare industrialaren balioespenari eta sentsibilizazioari esker, "Burdinaren Bidea" bezalako ekimenak sortzen ari dira. Burdinaren Bidea mugaz gaindiko ibilbide kultural bat da, Kultur Ibilbideetako Europako Batzordearen Programak bultzatutakoa, bost eskualdek osatzen dutena (Andorra, Katalunia, Arieja, Akitania eta Euskal Herria) eta burdina dutenak nortasun eta kultura-paisaia sortzen dituen elementu gidaritzat.

Gure museoa bisitatzera animatu nahi zaituztegu, eta ibilbide interesgarri honetaz gozatzera, gure eskualdeko burdinaren kulturaren eta tradizioaren balioa erakusten baitigu, baita harekin lotutako elementuak ere, hala nola meategiak, burdinolak, artxiboak eta arkitektura.