Eusebio Zuloagaren eskopeta damaskinatua 1864

Lefaucheux sistema duen eskopeta bat da eta urrezko eta zilarrezko apaingarri damaskinatuak dauzka pieza osoan. Kanoiaren goiko aldean fabrikazio-urtea eta egilearen izena ere ageri dira damaskinaturik:  ”Eusebio Zuloaga Arcab. De S.M.  Año 1864 En Eibar”. Apainketa elementuak kanoitik hasita eskopetaren kaxa edota arkuraino ikus ditzakegu. Giltzak, perkusio-sistema ziridunekoa, “frantziar erako" bi giltza ditu, baita urrezko eta zilarrezko damaskinatu-akaberak ere. Piezak maleta bat eta hainbat osagarri ditu, eskopeta gordetzeko eta mantentzeko.

Eusebio Zuloagak Isabel II. erreginaren garaian Errege Arkabuzgile titulua bereganatu zuen, eta, armagina izateaz gain, damaskinatuaren teknikaren bultzatzaile nagusietako bat izan zen, zeinaren bidez pikaketa erronboidal finez inkrustazioak hartzeko azalera prestatzen baitzen. Armagintzaren ogibidea txikitatik ikasi zuen: lehendabizi Soraluzen bere osaba Ramon izan zuen irakasle eta ondoren bere aita Madrilen; geroago, Parisen bukatu zituen ikasketak Jean Lepage-ren lantegian. Horrela, denboraren poderioz, nazioartean maisu ezaguna bilakatu zen (1830-32).

1843. urtean Errege Armategiko Teniente Armagin Gorena izendatu zuten eta 1844. urtean Isabel II. erreginak Errege Arkabuzgile kargua eman zion. Bi lantegi izan zituen Eusebiok, bata 1842. urtean ireki zuen Madrilen, eta bestea Eibarren 1848an. Orain aurkezten dizuegun pieza, eskopetaren kanoian idatzita ikusten den bezala, bertan fabrikatua izan zen 1864. urtean.