"Alfamatic 103 Modeloa", Alfa Josteko Makina

40. hamarkada Hileko pieza
ALFA enpresaren mendeurrenaren harira, abenduko hil honetan Alfako Alfamatic 103 modeloko josteko makina hau hautatu dugu hilabeteko pieza gisa. Izan ere, ALFA gure herriko industriaren garapenaren ikurra izan da.
Card image cap

Modernotasunaren ikono izandako 103 modeloko Alfa josteko makina, gailu unibertsala da lerrozuzenean eta sigi-sagan josteko; bi biraketako anezka du puntada bakoitzeko, haria tiratzeko sistema artikulatua, marrazkiak aukeratzeko agintea, eta puntadaren luzera bera mantentzen duen mekanismo berezi bat. Modelo honen merkaturatzea etxe eremura zuzendu zen; hala ere, konfekzio-industrian eta joskintzan ere erabili zen.

1920an langile sozialista talde baten eskutik "Sociedad Anónima Cooperativa Mercantil y de Producción de Armas de Fuego Alfa" sortu zenean, enpresa-eredu berri bat jaio zen: kooperatiba. Estatu osoko lehen kooperatiba industriala izan zen, non langileak akziodunak eta jabeak ziren.

Jatorrian "Smith & Wesson" errebolberrak ekoizten zituen, eta 1921ean Alfak bere suzko armen marka sortu zuen. Hala ere, 1925eko armagintza-krisiaren eraginez, enpresaren produkzioa beste arlo berri batzuetara bideratu behar izan zuen, armaginen egokitzeko gaitasun historiko eta ezaguna erakutsiz. Horrela hasi zen, hain zuzen, Alfa josteko makina ospetsuen ekoizpena. Erabaki hori, hala ere, ez zen izan kasualitatea edo hausnarketarik gabekoa; izan ere, zeuzkaten makinekin eta langileen espezialitatearekin teknikoki bateragarria zen produktua bilatu zuten, zeukaten azpiegitura industriala aprobetxatuta.

Bere bilakaera industriala indartzen jarraitu zuen Alfak, eta Estatuko josteko makinen lehen fabrika bihurtzea lortu zuen. 1940an sozietate kooperatibista berri gisa osatu zen, guztiz berriztuta eta "Máquinas de Coser Alfa, S.A." izena hartu zuen. Hamarkada horretan, josteko makinak mundu osoan esportatzen hasi zen Alfa enpresa; horren ondorioz, sare komertziala zabala sortu zuen hainbat agentzia eta sukurtsalen bidez, 70 herrialde baino gehiago hornitzeko gaitasuna izanik.

Gaur egun, jarduera industriala berriztuta eta kapital pribatuaren bidez enpresa berregituratuta, badira hamarkada batzuk Alfa josteko makinek enpresaren produktu izarra izateari utzi diotela.

Alfa josteko makinak Eibarko historiaren eta ondare industrialaren erreferente garrantzitsuak dira, eta Eibarko industriaren izaera ekintzaile eta berritzailearen eredu.