BH bizikleta estatikoa
Hala ere, Lehen Mundu Gerraren bukaeran, eta armagintzaren krisiaren ondorioz, 1923an bizikletak egiten hasi ziren. Laster, txirrindularitza talde bat muntatu eta lasterketak antolatzen ere hasi ziren. 1959an, Eibarren enpresaren garapenerako espazio egokirik ez zegoela ikusita, BH Gasteizera eraman zuten. Eibartik joan zen lehen enpresa handienetakoa izan zen (exodo hori areagotu egingo zen 70eko hamarkadan). Gaur egun oraindik oso marka ezaguna da, batez ere mendiko bizikletak (ingelesez MTB) egiten lehen enpresa europarra izateagatik eta nazioarteko zabalkundeagatik. 2012tik Gasteizko instalazioak itxita daude eta soilik Portugal eta Txinatik ekoizten dute.
Gure pieza modelo estatiko bat da, freno mekaniko baten bidez funtzionatzen duena. Aurreko gurpila dauka bakarrik, non katea eta frenoa bertara lotuta dauden. Frenoak marruskadura-indarra baliatzen du, pedalei eragiterakoan erresistentzia sortzeko. Bi eskulekuen artean daukan pieza biratuz erregulatu daiteke frenoa, pedalkada gogorragoa edo leunagoa lortzeko. Bizikleta berde argi kolorekoa da, malgukidun larruzko jarleku gorriarekin eta eskuleku metalikoarekin. Gainera, kate-estalki bat ere badauka markaren izenarekin eta gazela baten irudiarekin. BH Gacela markaren diseinuetako bat izan zen, eta hainbat modelo ezberdin atera zituzten izen horrekin, bereziki, 60 eta 70eko hamarkadan. Horrez gain, txasisean bi pegatina dauzka, enpresaren antzinako irudia izateaz gain (txirrindulari gorri bat) bizikletaren ezaugarrien inguruko hainbat informazio ematen digutenak, bai gaztelaniaz bai ingelesez. Esaterako, patente-zenbakia eta ekoizpen-urtea eta -tokia: Gasteiz 1959. Datu horri esker, Gasteizko fabrika berrian ekoitzi zen lehen bizikleta estatikoaren modeloa dela jakin dezakegu. Gainera, txasisa elektroforjaketaren teknika erabiliz eginda dagoela ere zehazten digute pegatinek, hau da, piezak soldadura elektrikoa erabiliz bateratuta daudela. Azkenik, bizikletak hiru elementu ditu aurreko aldean, are bereziago egiten dutenak: esku-tenporizadore bat 30 minutuko gaitasuna daukana, abiadura-neurgailua eta kilometro-kontagailua. Gainera, atzeko aldean giltza bat ere badakar eskulekuen, jarlekuaren eta txasisaren atzeko aldearen altuera erregulatu eta erabiltzaile ezberdinetara egokitzeko.
Dudarik gabe, txirrindularitzaren altxorretako baten aurrean gaude, begiratu bakoitzean xehetasun berri batekin harritzen gaituen pieza eder baten aurrean.