Silver Car Etenaldi-Sistema

2009 Hileko pieza
Hil honetan, azaroan, Euskadin "Zientziaren, Teknologiaren eta Berrikuntzaren XII. astea" ospatzen da. Europako ekimen garrantzitsu honek zientziarako, teknologiarako eta berrikuntzarako inguru sozial mesedegarriago bat sortzea du helburu. Horregatik, ospakizun honekin bat egiteko, hilabeteko pieza gisa, lasterketa-autoentzako Silver Car markako etenaldi-sistema hau aurkezten dugu, Engimek Ingeniaritzak Eibarren sortutakoa. Dudarik gabe, "made in Eibar" berrikuntza teknologikoaren adibide argia dugu.
Card image cap
Oro har, lasterketa-autoentzako etenaldi-sistemak, serieko ibilgailuentzakoak ez bezala, nahiko sofistikatuak izan ohi dira. Izan ere, sistema hauek diseinatuta daude, batetik, lehiaketetan izaten diren jauziak eta inpaktuak hartzeko eta, bestetik, autoa azkar egonkortzeko salto baten ondoren lurra hartzen duenean. Hots, sistema hauek egokitu eta erregulatu egin behar dira gidatze-era, pilotua eta lurzorua kontuan hartuta; horregatik ibilgailuaren oinarrizko osagaitzat hartzen dira.

CM ibilgailuentzako Silver Car sistema hau aluminioz eta karbono-altzairuz eginda dago; malguki helikoidal bat dauka eta baita presio altuko gasdun tutubakar erako motelgailua ere. Horrek guztiak ibilgailua altueretan erregulatzea ahalbidetzen du eta lasterketa-autoentzako berezko sistema bihurtzen du. Etenaldi-sistema hau Engimek enpresa eibartarrak sortu zuen neurrira 2009an ibilgailu jakin baterako: Silver Car markako 1 modeloa.

Silver Car FIAk homologatutako lasterketa-autoetan espezializatutako Nafarroako enpresa da. Modelo hauek bereziki diseinatuta daude mendi-txapelketetako CM kategorian eta nazio mailako zirkuituetan lehiatzeko. Izan ere, 2009an eta 2010ean hurrenez hurren, Silver Car S1 modeloarekin, Engimek-ek egindako supentsio-sistemaduna, Pedro Roca pilotuak Espainiako Mendi-Txapelketa irabaztea lortu zuen. Hurrengo urteetan beste pilotu batzuek ere garaipena lortu zuten baldintza berberekin .

Automobilgintza eta teknologia interesatzen bazaizkizue (edo gustuko izanez gero), hil honetan museoa bisitatzera animatzen zaituztegu non aipatutako pieza aurkitzeaz gain, gure hiribildu txikiaren ibilbide historiko-industrial eta teknologikoaz gozatu dezakezuen.